सैनिक संवाद

 #सैनिक_संवाद

   अवघे आयुष्य राष्ट्रार्थ जगणाऱ्या भारतीय सैन्य दलातील सैनिकांच्या जगण्याची ओळख विद्यार्थ्यांना व्हावी,राष्ट्रप्रेम जागृत व्हावे या हेतूने भारतीय सैनिक नामदेव कोकाटे यांच्याशी काल आमच्या #खंडाळा शाळेतील इयत्ता 5 ते 8 च्या विद्यार्थ्यांनी तंत्रज्ञानाच्या साहाय्याने व्हिडीओ कॉलिंग वरून संवाद साधला. ह्या सैनिक संवाद कार्यक्रमाचे निमित्त होते इयत्ता सातवी हिंदी विषयातील #हरिवंशराय_बच्चन यांची #हम_चलते_सिना_तान_के ह्या कविता अध्यापनाचे.

  याप्रसंगी भारतीय सैन्य करत असलेल्या देशसेवेबद्दल सैनिक नामदेव कोकाटे भरभरून बोलले. विद्यार्थ्यांनी अभ्यासाला प्रथम प्राधान्य देऊन नियमित व्यायाम,कवायत करावी तसेच घर, गाव, शाळा स्वच्छ राहील यासाठी सदैव पुढाकार घेणं ही देशसेवा असल्याचे सांगितले. विजयी विश्व तिरंगा प्यारा हे देशभक्ती समूहगीत गायन करून भारतीय सैनिकांप्रती विद्यार्थ्यांनी कृतज्ञता व्यक्त केली.

 सैनिक संवाद कार्यक्रमामुळे विद्यार्थ्यांमध्ये राष्ट्रभक्ती ह्या मूल्याची रुजवणूक करण्यात मोलाचा हातभार लागला. देशभक्तीच्या घोषणा देत जय हिंद म्हणत सर्वांनी सैनिक नामदेव कोकाटे व भारतीय सैन्यदलाच्या कार्याला नमन केले. सहकारी स्नेही अध्यापक श्रीकृष्ण वाकोडे, ओमप्रकाश निमकर्डे, राजेंद्र दिवनाले, गोपाल मोहे, निखिल गिऱ्हे, सौ. सुरेखा हागे यांनी स्वागतपर संवाद साधला. 

   चाळीस मिनिटे चाललेल्या सैनिक संवाद कार्यक्रमाने शाळेतील वातावरण देशभक्तीमय करता आले याचा मनःपूर्वक आनंद वाटतोय.

---तुळशिदास खिरोडकार

   9970276582

शाळा व्यवस्थापन समिती सदस्य सक्षमीकरण प्रशिक्षण

 खंडाळा येथे शाळा व्यवस्थापन समिती सदस्य सक्षमीकरण प्रशिक्षण संपन्न.

     तेल्हारा तालुक्यातील जिल्हा परिषद वरिष्ठ प्राथमिक केंद्र शाळा खंडाळा येथे 10 मार्च 2022 रोजी केंद्रस्तरीय शाळा व्यवस्थापन समिती सदस्य सक्षमीकरण प्रशिक्षण घेण्यात आले. सर्वप्रथम क्रांतीज्योती सावित्रीबाई फुले यांच्या स्मृतिदिनानिमित्त त्यांच्या प्रतिमेचे पूजन मान्यवरांच्या हस्ते करण्यात आले.

        शाळा व्यवस्थापन समिती व शिक्षक यांच्या समन्वयाने शालेय प्रगती साधता येते या हेतूने परिपूर्ण माहिती प्रशिक्षणाच्या माध्यमातून देण्यात आली. यावेळी खंडाळा येथील शाळा व्यवस्थापन समितीचे अध्यक्ष दिनकर धुळ, झरी बाजारचे अध्यक्ष भिका तायडे, केंद्रप्रमुख गजानन गायगोळ, मुख्याध्यापक शीला टेंभरे, आशा सोळंके, शारिक अली तसेच खंडाळा केंद्रांतर्गत शाळा व्यवस्थापन समितीचे सदस्य व मुख्याध्यापक, शिक्षक यांची उपस्थिती होती.सदर प्रशिक्षणासाठी केंद्रप्रमुख गजानन गायगोळ, सहायक अध्यापक तुलसीदास खिरोडकार, दीपक पोके, गोपाल मोहे यांनी सुलभक म्हणून काम पाहिले.

खंडाळा येथे जागतिक महिला दिवस साजरा

              खंडाळा येथे भरली थोर मातांची शाळा 

                    जागतिक महिला दिन साजरा

       संपूर्ण भारतात आपल्या कार्य कर्तृत्वाने अजरामर झालेल्या व भारतवर्षाला प्रेरणा ठरलेल्या थोर मातांची शाळा जागतिक महिला दिनाच्या निमित्ताने खंडाळा येथे भरली.

    शिक्षण, संस्कृती, राजकारण, सामाजिक, धार्मिक क्षेत्रात उल्लेखनीय कार्य करणाऱ्या राजामाता जिजाऊ, क्रांतीज्योती सावित्रीबाई फुले, अहिल्यादेवी होळकर, प्रतिभाताई पाटील, रमाई, भीमाई, इंदिरा गांधी, लता मंगेशकर, सिंधूताई सपकाळ यांच्यासह थोर व्यक्तिमत्वाच्या व्यक्तीरेखा विद्यार्थिनीनी साकारल्या. थोर मातांनी त्यांच्या जगण्याची वाटचाल उपस्थित विद्यार्थ्यांसमोर मांडली. 

   व्यक्तीरेखा रेखाटणाऱ्या विद्यार्थिनीना जेष्ठ लेखिका प्रतिमा इंगोले यांच्या माऊली व असा कसा शेतकरी ह्या कवितेचे पोस्टर मुख्याध्यापक शीला टेंभरे, जेष्ठ शिक्षक श्रीकृष्ण वाकोडे, ओमप्रकाश निमकर्डे, तुळशिदास खिरोडकार, राजेंद्र दिवनाले यांच्या हस्ते भेट देऊन कौतुक करण्यात आले. कार्यक्रमाचे प्रास्ताविक गोपाल मोहे, संचालन सुरेखा हागे तर आभार निखिल गिऱ्हे यांनी मानले.

राष्ट्रीय विज्ञान दिन साजरा

 प्रसिद्ध शास्त्रज्ञ डॉक्टर सी व्ही रमण यांची जयंती देशभर राष्ट्रीय विज्ञान दिवस म्हणून साजरी करण्यात येते. यानिमित्त जिल्हा परिषद केंद्र शाळा खंडाळा येथे राष्ट्रीय विज्ञान दिन साजरा करण्यात आला. यावेळी विद्यार्थ्यांनी सहज व सोपे प्रयोग सादर केले.